DENAKOL, 1562

Esther Inglis (?), 1591

CONFESSION DE LA FOY CHRESTIENNE

Laquelle a esté mise en Rime Françoise, à la grande consolation spirituelle de toute personne fidele.  Contenant en somme, les principaux Articles de nostre Foy: & tresclaire intelligence des saints Sacremens. Et à cette fin qu’elle puisse apporter quelque fruit dauantage au Lecteur pour se resiouir en Dieu: a esté proprement accommodée sur le chant du Psalme CXIX Bienheureuse est la personne, &c. De façon que par icelle, on peut estre edifié, la lisant simplement, ou la chantant spirituellement, pour la mieux retenir en memoire.

A LYON,

1562

SOMMAIRE

DISCOURS

DE LA FOY, CONTENANT

QUARANTE

STANCES

       ALEPH

Pvisque Sathan bataille contre nous,

Par l’antechrist nostre grand aduersaire:

Or sus Chrestiens armons nous donq tretous   sic

Prenons la Foy, ne nous laissons deffaire,

Et confessons en toute verité

La Foy qu’auons receu de Dieu le Pere.

2.

Chassons de nous toute infidelité,

Car croire faut de bon coeur en iustice,

Et confesser sans nulle infirmité

De bouche aussi, sans flater point le vice:

Or disons donq, & confessons la Foy,

Et ce faisant Dieu nous sera propice.

 3. 

Ie croy en Dieu nostre souuerain Roy,

Dieu tout-puissant & Seigneur debonnaire,

Et createur qui tout a fait pour soy,

Trois en vn Dieu qui n’a de rien affaire,

Le Pere, & Fils, aussi le saint Esprit,

Trois ne sont qu’vn c’est nostre Foy tresclaire.

4  

Aimer il faut ainsi qu’il est escrit,

Ce Seigneur Dieu en toute obeïssance,

Et l’adorer tout seul, comme il a dit.

Si aucun a disette & indigence,

A luy se faut retirer promptement,

Et inuoquer sa divine clemence.

I.

Cependant ô Chrestiens, que Satan trauaille,

 Et que son lieutenant nous dresse une bataille

Prenons la foy pour guide, asseurons nostre coeur,

Christ estant nostre chef, et la Foy nostre enseigne,

Il ne faut avoir peur que le diable entrepreigne,

Ny que jamais il puisse estre sur nous vainqueur.

II.

Marchons en ordonnance, et croyons en Justice,

Et si nous desirons que Dieu nous soit propice

Chassons de nostre camp toute infidelité:

Car elle est de la Foy l’aduersaire Jurée,

Et sa gloire sera de bien peu de durée,

Si nous ioignons la foy auecques verité.

III.

Nous croyons donc en Dieu, souuerain, inuincible,

Admirable ouurier, parfaict, puissant, terrible,

Pere, fils, Saint esprit, & triple en vnité,

Seul iuste, bon et grand, seul adoré des Anges.

Et de nous ses enfans, qui luy rendons louänges,

Et honneur, et hommage, en toute humilité.

IIII

Il est nostre secours, il est nostre tutelle,

Nostre chasteau muni, nostre recours fidelle,

Nostre tour, nostre fort, au fort de nos malheurs:

Au temps calamiteux c’est luy qui nous deliure,

Qui languissants de faim nous paist, & nous fait viure:

Qui durant nos ennuis, nous essuye nos pleurs.

BETH 2

5. Car de luy vient tout bien entierement,

C’est luy qui tout gouuerne en ce bas monde:

Voire des cieux a le gouuernement.

Il entretient toute la terre ronde,

Et ne pouuons sans luy rien besogner,

Mais auec luy tout bien il nous abonde.

6.

Il luy a pleu l’homme faire & former

A son image & diuine semblance,

Bon & parfait il le voulut creer.

Montrant en luy sa gloire & sa puissance:

Mais par Sathan il fut tost suborne  sic

Dont il perdit sa premiere excellence.

7.

Soudain il fut de Dieu abandonné,

Et despouillé de son bel heritage,

Serf de peché il fut lors condamné:

O quel malheur de faire au diable hommage,

Et delaisser son souuerain Seigneur,

Helas Adam nous en souffrons dommage.

 8.

Mais ce bon Dieu appaisant sa rigueur,

Il eut pitié, làs de sa creature,

Dont luy promit par sa grace & faueur,

Vaincre Sathan ennemy de nature,

Et luy briser la teste vaillamment,

Et enuoyant semence sainte & pure.

V.

De luy & non d’ailleurs, sourd toute chose bonne:

Si nous avons des biens, c’est luy qui les nous donne,

Car la terre est à luy, & son throne est és cieux:

Nous ne pouvons sans luy rien faire ne parfaire:

Il conduit nostre esprit, nos mains & nostre affaire,

Nous bande quand il veut, & desbande les yeux.

VI

Aprés ce tout formé, il feit à son image

Adam, et luy donna la terre pour partage:

Il inspira dans luy un esprit immortel:

Le feit parfaict, & bon, l’enrichit de sa grace:

Heureux estoit Adam, et heureuse sa race,

Si orné de ces dons il fust demeuré tel.

VII

Mais le prince d’enfer au bien portant envie,

Et au repos d’Adam, et à l’heur de sa vie,

Sous la peau d’un Serpent sa femme et luy deceut,

Luy faisant transgresser l’ordonnance divine,

Dont advint la revolte, & aprés la ruine,

Le dommage, la perte, et le mal qu’il receut.

VIII

Aprés un tel forfait, et une telle offense,

L’homme infracteur de foy demeuroit sans defense,

A la Mort, à l’enfer, miserable submis,

Si DIEV n’eust regardé en pitié sa facture,

Et promis de tirer, prenant nostre nature,

L’homme sien hors des fers où Satan l’avoit mis.

GIMEL 3

9  Cela promis aux Peres voirement,

Donna la Loy pour viure en sa iustice,

La commandant garder entierement,

Mais l’homme enclin à tout mal & à vice,

Comme pecheur ne la peut accomplir,

Dont eut besoing que Dieu luy fut propice.

IX

Nos peres ont vescu en heureuse vieillesse:

Ont creu de pere en fils à si sainte promesse:

Et sur elle ont fondé leur espoir & leur foy.

Cependant l’Eternel cognoissant combien vaine

Et fragile de soy, est la nature humaine,

Sur le mont de Sina feit entendre sa loy.

X

Au son des elements, des trompes nompareilles,

Il la feit publier & sonner aux oreilles

Des enfans de Iacob, afin qu’à l’advenir

Elle fust comme adresse, elle fust comme guide,

Ou comme un pedagogue, ou bien comme une bride,

Pour ce peuple effrené conduire et retenir.

XI

Mais l’homme quel qu’il soit, fust-il reputé iuste,

Ne la peut accomplir, et n’est assez robuste

De soy, pour supporter de la loy le fardeau.

N’accomplissant la loy, la loy mesme le Juge,

Son peché le condamne, et n’a nul subterfuge,

Qu’il ne soit par la loy heritier du tombeau.

10.

Point ne faisoit la Loy l’homme mourir:

Mais le peché qui le rendoit contraire,

Car le mauuais le bien ne peut sentir.

L’homme estant donq de Dieu grand aduersaire

Sujet estoit à malediction,

Causant la mort du peché de sic salaire.

 11.

Nous confessons la benediction

Par Iesus Christ à l’homme estre donnee:

C’est Iesus Christ qui fit l’oblation

Par son moyen nostre chance est tournee

Car c’est la fin & l’accomplissment

De cette Loy de Dieu ia ordonnee.

XII

Son peché, non la loy, est cause de sa perte:

Le sens est donc tout clair & la raison aperte,

Que l’homme par la loy ne peut prendre renfort:

Donc tout consideré, nous concluons qu’au monde

Par la loy du Seigneur, sans qu’ailleurs on se fonde,

Est cognu le peché, du peché vient la mort.

12.

Estant promis dés le commencement,

Pour restaurer l’humaine creature

Au temps prefix il vint certainement,

Au ventre saint d’vne vierge trespure,

Estant vray Dieu, vray homme il se fit

Hors de peché, là print nostre nature.

            DALETH 4

  13. Le Fils de Dieu de la vierge nasquit,

Le saint Esprit auteur de cet ouurage,

De s’en mesler à l’homme ne permit:

O quel bonheur qu’a nostre humain lignage

D’estre conioint à la Divinité

Du Fils de Dieu: faisons luy donq hommage.

14. 

Nous confessons, comme est la verité,

Que Iesus Christ oinct d’huyle inuisible

Du saint Esprit, luz donnant dignité

D’estre grand Roy aux fideles paisible,

Prophete aussi & Sacrificateur ,

Aux reprouuez se monstrant fort terrible.

15.

O nous heureux d’avoir vn tel Seigneur,

Le Fils de Dieu, Prophete, Roy & Prestre,

Qui par sa croix s’est fait nostre sauueur.

Il luy a pleu par sa mort nous remettre,

Au bon chemin lequel auions perdu,

Le seruiteur faisant deuenir maistre.

 16. 

Aux enfers donq croyons est descendu

Souffrant douleur de mort en grand detresse:

Mais tout il a vaincu par sa vertu,

C’est tout pour nous qu’il a souffert angoisse:

Car sur la croix les pecheurs il plegeoit,

Ne craignons plus nulle mortelle opresse.

XIII

Les hommes par peché receurent tel dommage,

Que bannis pour iamais du celeste heritage

Ils estoyent derechef à la mort exposez:

Mais suivant la promesse à nos peres donnée,

En despit de Satan, nostre chance est tournée,

Et CHRIST nous a remis d’où estions deposez.

XIIII

C’est CHRIST le fils de Dieu, issue d’une pucelle,

Conceu du Saint Esprit, en nostre chair mortelle,

Qui vray homme & vray Dieu nous a fauorisé.

C’est luy qui de la mort a remportée la gloire,

Si qu’on peut s’escrier, Mort, où est ta victoire?

Où est ton esguillon, ô sepulchre brisé? 

XV

C’est luy qui est venu en ce monde pour estre

Nostre Prophete saint, nostre Roy, nostre Prestre,

Pour nous prescher salut, et monstrer la clarté:

Soulager nos malheurs, porter nostre misere,

Pour nos iniquitez s’offrir à Dieu son pere,

Et de captifs qu’estions, nous mettre en liberté.

XVI

Heureux, trois fois heureux, se peut bien l’homme dire,

Qui a pour son sauveur, celuy duquel l’empire

A iamais permanent, s’estend par sus les cieux,

Qui fait trembler la terre, et duquel la voix saincte

Dethrone les grands Rois, et tient le monde en crainte,

Faisant par tout paroir ses effects merveilleux.

HE. 5

 17. Sathan sur nous grande puissance auoit,

Mais cette croix est nostre deliurance,

Fy de la mort qui tant nous menaçoit.

Sa Passion nostre ferme assurance

Et par son sang auons purgation

De noz pechez en pleine suffisance.

 18. 

Nous confessons sans simulation

Au monument auoir prins sepulture,

Trois iours apres sa Resurretion.

Tout il a fait pour nous, dit l’Escriture,

Ayons la Foy & aspirons aux Cieux,

Car par sa croix nous a fait ouuerture.

XVII

O amour admirable! ô nompareille grace!

O mystere profond! ô scavoir qui surpasse

Les esprits plus aigus, et les sens des humains!

Quand nous pensons à nous, que ce grand Dieu terrible

A bien daigné vestir nostre chair corruptible,

Pour nous povres chetifs, l’ouvrage de ses mains.

XVIII

Il a porté le ioug pour nostre ame asservie,

Il a souffert la mort pour nous donner la vie,

A esté nostre pleige, esté nostre garent,  sic

Il est ressuscité nous tirant de servage,

Est monté dans les cieux pour nous faire passage

Et nous faire heritiers de son Royaume grand.

XIX

Arriere mort arriere, & toy Satan arriere,

Qui teniez cy devant nostre ame prisonniere:

Nous sommes acquitez, CHRIST a payé pour nous.

Mort, nous ne craignons plus ta poignante sagette,

Ne Satan ton enfer puis que CHRIST nous rachette,

Et qu’il a de son pere, appaisé le courroux.

 19. 

De mort, d’enfer estant victorieux,

Et de sathan Dieu de ce territoire,

Il est monté la haut Roy glorieux.

Il est assis en grand honneur & gloire

A la dextre du Pere tout puissant

Gouuernant tout, ainsi le voulons croire.

 20.

Sur tous il est la haut ou resplandit,

Nostre Aduocat & chef de son Eglise,

Puisse perir qui son honneur rauit.

En luy tout seul nostre esperance est mise,

Seul le croyons nostre Mediateur,

Seul l’inuoquons car c’est nostre franchise.

XX

Victorieux d’enfer, de la mort, & du diable,

Il est au ciel assis sur son siege equitable,

Intercedant pour nous comme mediateur:

Aussi est-ce en luy seul que gist nostre esperance,

Et au nom seul duquel nous prenons asseurance

D’offrir a l’Eternel nos voeus & nostre coeur.

XXI

Il est aux cieux monté, et la haut il preside

En son throne eternel, où homme-dieu reside,

Iusq’au iour qu’il viendra en son haut appareil

Environné de gloire et de magnificence,

Asseurer ses esleus, et prononer sentence

Contre les reprouues et contre leur orgueil..

XXII

Il ne fait donc que l’homme eslourdi de folie

Le cerche en vn ciboire, ou bien en vne oublie,

Ny au temple caché, mais puisqu’au ciel est Christ,

Nous eslevons nos yeux, et par la vertu sainte,

De l’Esprit tout voyant, nous le prions sans feinte:

Le priant le voyons des yeux de nostre esprit.

VAU.6

  23. Point ne voulons autre intercesseur,

Car luy tout seul suffit enuers le Pere,

Honneur diuin n’est deu au seruiteur.

A vn seul Dieu hommage conuient faire,

Les saints voulons en honneur imiter,

A vn seul Dieu, nous desirons complaire.

24. 

Croyons aussi qu’aux cieux voulut monter,

Vray homme Dieu en propre chair humaine:

En propre corps veut la haut habiter.

De le cercher icy c’est chose vaine,

De le fermer en quelque lieu caché,

Point ne convient à sa cour souueraine.

XXIII

Nul autre n’avouons, qui pour nous intercede,

De luy nostre Justice & vray salut procede:

C’est a luy, non aux saincts, que l’honneur appartient,

Mais avecque les saincts luy rendons los Et gloire,

Et de Peres en fils celebrons sa memoire,

Car comme d’un surgeon, tout bien de luy nous vient.

25.

Nous confessons & croyons sans peché,

Le saint Esprit notre Dieu amiable,

Viuifiant tout esprit entaché.

Regenerant le pecheur miserable,

Ayant l’Eglise en son gouuernement,

La conduisant par sa grace admirable.

 26. 

Croyons aussi sans douter nullement,

De tous Chrestiens vne Eglise fidele,

De ces pechez purgée nettement,

En esperant la vie eternelle,

Par Iesus Christ son espoux amoureux,

Qui par son sang là sic fait gentile & belle.

XXIIII

Nous croyons en l’Esprit de nos esprits l’adresse,

L’auteur de verité, de clarté de sagesse,

L’ange d’eternité, splendeur de l’immortel,

Conducteur, gouverneur, donne-sens donne-vie:

Restaurateur de l’ame, ennemy de l’envie:

Bening, paisible, doux, admirable, eternel.

XXV

L’Eglise nous croyons chrestienne, universelle,

Mere de tous esleus, & l’espouse fidelle

De Christ, qui la soustient, la garde, la cherit,

Qui la fait triompher malgré son adversaire:

Qui la rend ferme & stable en son temps plus contraire,

La defend, la preserve, alors que tout perit.

XXVI

De grace & de salut l’Eglise est revestuë,

Le saint Esprit la guide, et la rend plus cognue,

Sa splendeur est au chef, et sa beauté aux yeux:

La charité , l’espoir, et la foy sont ses ailes,

La povreté la suit, & porte en ses mammelles

L’innocent eschapé du tyran furieux.

XXVII

 Nous croyons l’unité des esleus en l’Eglise,

Que comme vn cors parfaict du chef on ne diuise,

Aussi ne nous peut-on separer d’auec Christ:

Nous ne sommes qu’un corps, que l’eternel assemble,

Qui prend vigueur du chef, si que liez ensemble

Auons mesme vertu, mesme sens, mesme esprit.

ZAIN.7

  27. O que celuy se peut tenir heureux,

D’estre nombré en cette Eglise sainte

Il n’ya point de Iudas mal-heureux.

Saül aussi, ne Cain en sa crainte,

Achab n’y est, n’aucun qui veut seruir

A Iesabel de tout peché enceinte.

28.  

Nous confessons & voulons maintenir,

Communion des Saints en cette eglise,

C’est qu’entre nous, nous deuons départir

Biens terriens selon la part acquise:

Car comme en Foy trestous communiquons,

En charité la Foy doit estre assise.

  29.

Grace & salut en l’Eglise croyons,

Mais hors n’y a que mort, douleur & peine,

L’arche Noé, semblable la disons,

Des Sacremens de discipline est pleine

Son fondement, la predication

Du verbe sain qui à la vie meine.

 30. 

Les hommes saints par inspiration

Du saint Esprit, furent esmeus d’escrire

La Loy de Dieu & sainte instruction.

Vieil & Nouueau Testament voulons lire,

Et tous les deux selon la verité,

Nous confessons à salut nous suffire.

XXVIII

Ainsi nous jouïssons, vnie, de la franchise

Et des biens, & des dons, que Christ fait à l’Eglise,

Pour obtenir pardon de nostre iniquité.

Croyons en ferme foy que viendra la journée,

Que reprendrons nos corps, &  nous sera donnée

Vne eternelle vie, és lieux d’Eternité.

HETH. 8

31.   Deux Sacremens signes de charité,

Nous receuons, la Cene & le Baptesme:

Signes y sont ayans diuinité.

Les seaux de Dieux donnans la chose mesme,

Vains il ne sont: mais ont force & vigueur,

Car ils nous sont prochains de Dieu supréme. sic

 32. 

Premierement Iesus reformateur

A commandé le Baptesme tresdigne

Pour reformer le vieil Adam pecheur,

L’element d’eau ne nous sert que d’vn signe,

Le saint Esprit au sang de Iesus Christ,

Purge le tout par sa grace benigne.

 33.

La Cene aussi ainsi qu’il est escrit,

Nous confessons en toute reverence,

Grand Sacrement vn merueilleux edit.

L’homme charnel n’a nulle intelligence,

Quiconque veut l’entendre & le sauoir

Selon l’esprit, doit auoir la science.

34.

Escoutez donq, si voulez bien auoir,

Ce Sacrement n’est pas rien incredible,

Car c’est la Foy qui fait tout conceuoir.

Manger le corps par la Foy est possible,

Charnellement rien ne permet penser,

L’Esprit par Foy prend la grace inuisible.

XXIX

Or nous ne pourrions pas bien rendre tesmoignage

Des promesses de Christ, si nous n’auions pour gaige,

Et sa marque et son scel, ou quelque sacrement,

Et lettre de faueur, pour monstrer que nous sommes

Ses esleus, ses soldats, ses seruants & ses hommes,

Et que pouuions passer ses paruis librement.

XXX

Nous auons le Baptesme, où Dieu nous represente

 Par ce saint caractaire et marque suffisante

Nostre ressource en Christ, nos pechez annulez,

Guerison de nos maux en sa sainte piscine:

Et comme par la foy ceste grace diuine

Fait que sommes au rang des esleus enrollez.

XXXI

La Cene es le grand seau et la sainte alliance

De Christ auecque nous, qui fait que par fiance

Nous sommes pleinement auecque Christ vnie.

Si qu’entez en son corps, & en sa chaire tressaincte,

A sa grace, à ses biens participons sans feinte:

Et sommes sans douter auecque luy benits.

TETH. 9

35.   Or confessons qu’au vray pouuons manger

Le corps de Christ & son sang aussi boire:

Mais nostre Esprit seul s’en peut sustanter,

Le tout faisons à l’honneur & la gloire

De Iesus Christ, qui nous a commandé

Ce Sacrement le faire en sa memoire.

36. 

Car d’iceluy grand fruit nous est donné,

Nostre ame en vit, l’esprit prend nourriture,

Chair de sa chair nous fait par charité,

Os de ses os vnis à sa nature,

Participans fort merueilleusement

En tous ces biens, comme dit l’Escriture.

37.  

Telle est la Foy qu’auons du Sacrement,

Ce neantmoins ne cesse l’auersaire,

De nous troubler par tout cruellement,

Qui ainsi croit est dit Sacramentaire,

Il est pour vray: car c’est la sainte Foy,

De tous les saints enfants de Dieu le Pere.

 38. 

O Seigneur Dieu oste nous hors d’esmoy,

Car outragez sommes pour ta querelle,

Tes ennemis veulent ruiner ta Loy,

Donne secours, regarde nostre zele:

Car tout cecy ne nous vient que de toy,

Deliure donq ton Eglise fidele.

XXXII

O souuerain banquet! ô celeste conuiue,

Qui l’homme auecque Christ conioint par la foy viue!

O admirable foy qui fais qu’en vn moment

Nostre ame monte aux cieux, & que là haut repue

De bruuage immortel, elle ait encor la veuë

De celuy qui regit l’estoilé firmament!

XXXIII

Combien d’esprits brouillons ont abusé le monde,

Pour n’auoir bien compris la science profonde

De ce mystere sainct, qui suiuans le r’enuoy

Et les subtilitez de la nature humaine,

Se sont laissé trainer à leur raison tresuaine,

Et n’ont point sauouré les discours de la foy?

XXXIV

La foy est celle-la qui combat le mensonge,

Qui releue d’erreur celuy-la qui s’y plonge,

Qui separe & desioint Babylon de Sion,

Christ d’auecque Baal, doctrine d’ignorance:

Qui donne plein repos, & qui donne asseurance

Au fidele chrestien au temps d’affliction.

XXXV

La foy fille de Dieu, et de son throne issue

Ne regarde qu’au ciel, d’où elle est descendue:

Elle ne loge point auecque les mondains:

Son seiour est au coeur de l’ame humiliée:

Plus elle est en vigueur, quand plus est trauaillée,

Et tousiours de sa voix les effects sont certains.

XXXVI

Qu’as tu donc à japper hypocrite en dispute

Contre la foy des saints? scais-tu pas que le juste

Comme est dict, vit de foy? et quoy ne sçais-tu pas

Que la chair rien ne sert, mais l’esprit viuifie?

Le corps de Christ adonc et son sang donne vie?

Et par foy nous goustons ce celeste repas.

XXXVII

Voila quelle est la foy, voila que Christ enseigne,

Duquel seul nous deuons par foy suiure l’enseigne,

Sans redouter ne craindre vn tas de mesdisants,

Qui nous taxent d’erreur, comme gens heretiques,

Qui mettent tout leur soing et toutes leues pratiques

Pour nous mettre en horreur entre tous les viuants.

XXXVIII

Pour quitter l’ignorance on nous charge d’injure;

On nous nomme menteurs pour suiure l’Escriture

Dictée du grand Dieu, et reduite en escrit

Par les prophetes saincts, par Christ mesme annoncée,

Par ses ambassadeurs au monde prononcée

Inspirez et instruits de l’Eternel Esprit.

Pour nous mettre en horreur entre tous les viuants.

           IOD.10

39.  Mal on nous dit estre seditieux,

Car nous aimons tout bon ordre & police,

Et desirons punir les vitieux.

Les Roys croyons leur puissance & iustice,

Le prince aussi auec son gouuernement,

Nous confessons estre vn diuin office.

 40. 

Croyons aussi que Dieu le createur

A ordonné pour tous le mariage:

Le prohiber ne peut l’homme menteur.

Combien voit-on regner concubinage,

Mais au paillard Dieu ne fera mercy,

Car auec luy n’aura nul heritage.

  41.

Puis que pecheurs trestous sommes icy,

Nous confessons la diuine clemence,

De tous pechez remission aussi,

Nous attendons certaine deliurance

Ayant la Foy pour nous iustifier.

En Iesus Christ seul nostre suffisance.

42.

Nous confessons sans nous glorifier,

Que tout bien fait n’est vain ne inutile.

La Foy le peut à Dieu verifier.

Le bien il veut recompenser par mille:

Mais tout cela se fait par Iesus Christ

Par lequel Dieu nous est doux & facile.

KAPH.11

43.La viue Foy par oeuures Saint Paul dit

Car autrement sans oeuures elle est morte,

Les Diables ont la Foy comme est escrit.

Qui croit en Dieu comme eux de telle sorte,

Sans faire bien, embrassant tout forfait,

Au feu d’Enfer son ame il transporte.

44. 

Nous confessons que le seul Dieu parfait

Peut pardonner tous les pechez des hommes,

Le sang de Christ couure nostre meffait.

Sans Iesus Christ miserables nous sommes,

En luy nous faut tousiours bien consoler,

Par viue foy à luy soyons conformes.

45.

Ce neantmoins nous voulons confesser,

Qu’il a donné a noz Pasteurs puissance,

En Iesus Christ remission prescher.

Lesquels aussi en seine intelligence

D’excommunier on receu le pouuoir,

Et d’accepter pecheurs à penitence.

 46. 

Nous attendons du Seigneur le vouloir,

Quand il fera consommer tout le monde,

Son iugement croyons sans le sauoir.

Tous les viuans de cette terre ronde

Trespasseront ou seront transformez,

Puis reuiuront c’est chose fort profonde.  [!!!]

LAMED.12

 47.  Les bons seront en Christ tous refomez sic

Resuscitans en grand honneur & gloire

Mais les mauuais seront tous enflammez.

Les saints esleus de mort auront victoire,

Puis regneront perpetuellemet

Là sus au ciel, ainsi le voulons croire.

50.  

Telle est la foy qu’auons dit maintenant:

Viure & mourir nous voulons en icelle.

O Seigneur Dieu qui n’as commencement,

Preserue nous en la vie mortelle,

Quand tu seras venu en iugement:

A tes seruans donne vie eternelle.

XXXIX

 Pour estre nostre Eglise à son espoux fidele,

Rebelles, turbulents, mutins on nous appelle,

Contraires ennemis des Princes et des Roys,

Qui toutesfois voulons obeissance rendre

Au Prince, au Magistrat, et librement entendreLeurs iustes mandements, leurs edicts, et leurs loix.

XL.

O Dieu qui vois nos coeurs, et ceux de nos contraires,

Prens nostre cause en main, mets fin en nos miseres,

Renforce nos esprits de constance & de foy:

Et lors ny les tourments, ny les fers, ny les chables,

Ny les fouets, ny les feux, des Tyrans execrables

Ne nous pourront jamais distraire d’auec toy.                            FIN